Örlítið um tímastjórnun og skipulag Tímastjórnun Hver kannast ekki við að hafa of lítinn tíma. Örfáir dagar til að undirbúa fyrirlestur, fjöldinn allur af bókarköflum og greinum sem þarf að lesa og kannski vika í ritgerðarskil! Hvað felst í tímastjórnun? Tímastjórnun er viðbragð við „stjórnlausar“ aðstæður þar sem markmið dagsins, vikunnar eða mánaðarins eru skipulögð. Hvert markmið fær sinn tíma og sá tími er fullnýttur. Við getum ekki stjórnað tímanum en við getum stjórnað okkur sjálfum til að fullnýta tímann sem við gefum okkur fyrir hvert markmið og hvert verkefni. Segjum að markmið dagsins er að lesa tvo kafla fyrir morgundaginn. Auðvitað er sumt áhugaminna en annað í kaflanum rétt eins og sumt er áhugameira. Þegar áhuginn er lítill þá er athyglin lítil og manni finnst kaflarnir vera langir og lesturinn verður hægur. Þegar mikið er að lesa er gott ráð að búta lesefnið í smærri eindir því það gerir efnið auðveldara til viðureignar. Gott er að skipta köflunum tveimur í smærri kafla eftir innihaldi og taka tímann sem það tekur að lesa hverja blaðsíðu. Þannig má áætla tímann sem tekur að lesa hvern kafla (minni kaflana) og við fáum raunsætt mat á því að hægt sé að ljúka markmiðinu þ.e að lesa kaflana tvo fyrir morgundaginn. Með þessari aðferð verður lesturinn markviss og athyglin endist lengur sem gerir það að verkum að leshraðinn eykst. Þessi aðferð verður ekki sjálfstýrð eftir fyrsta skiptið sem hún er reynd. Það þarf að tileinka sér hana með því að þjálfa sig í henni. Í fyrstu er athyglisspönnin ekki löng, hún endist kannski ekki nema í korter til tuttugu mínútur. En með þjálfuninni þá lengist hún og það fer að taka styttri tíma að lesa kaflana. Það má ekki gleyma að það er nauðsynlegt að taka pásur á milli kafla og sérstaklega ef athyglin fer að dvína. Pásurnar mega þó ekki vera of langar. Hvernig á að skipuleggja sig? Oft spyr maður sig, hvað er mikilvægast að gera í dag? Hvað á að gera næst? Við erum stöðugt að velja og hafna. Við höfum valið að vera í námi og það krefst sjálfsaga að stunda það. Oft þarf að hafna góðu boði því námið gengur fyrir og oft sleppum við að læra svo hægt sé að gera eitthvað skemmtilegt. Við veljum að horfa á sjónvarpið eða fara á kaffihús en við veljum líka að læra! Skipulag gefur okkur tímafrelsi til að gera þá hluti sem okkur langar að gera, bæði í námi og í frítíma. Hvað er skipulag? Verkefnaáætlun og tímastjórnun er skipulag. Með því að forgangsraða verkefnum, velja aðferð til að ljúka þeim erum við að skipuleggja og fullnýta tímann. Námsráðgjöf tala um sjö skref í átt að góðri tímaskipulagningu. 1. Skipulegðu námslotur/vinnulotur fyrirfram 2. Lærðu við kjöraðstæður 4. Skilgreindu hvað þú ætlar að læra og hvenær. 5. Skiptu námslotum á milli námskeiða og verkefna – fjölbreytni Á heimasíðu námsráðgjafar er hægt að nálgast verkefnaáætlanir sem hægt er að setja niður sjálfur, markmið dagsins, vikunnar og mánaðarins. Sjá slóð: (http://hi.is/page/namsradgjof_eydublod). Inn á planið á að setja inn, kennslustundir, verklega tíma og verkefnaskil. Auk þess á að setja inn áætlaðan tíma í heimamám í hverju námskeiði fyrir sig. Í hverri viku þarf svo að endurskoða áætlunina því auðvitað getur hún breyst og þá þarf að gera nýja áætlun. Mikilvægt er að verkefnaáætlunin sé raunhæf! Þær eru ekki hugsaðar sem heilagar reglur heldur eru þær hugsaðar sem yfirsýn yfir námið og þess vegna má breyta þeim ef ástæða er fyrir því. Það gerist að við verðum fyrir óvæntum truflunum eins og símhringingu eða heimsókn slíkt truflar kannski verkefnaáætlunina en þá þarf bara að enduraða skipulaginu eftir því. Hægt væri þó að koma í veg fyrir sumar óvæntar truflanir með því að slökkva á símanum eða aftengjast netinu. Það má þó ekki gleyma frítímanum sínum! Mikilvægt er að njóta frítímans án þess að hafa áhyggjur af komandi eða ókláruðum verkefnum, enda er frítíminn okkar umbunun fyrir vel unnin verk. Að lokum er vert að minna á að allt hefst með einu skrefi og að fylla út verkefnaáætlun er fyrsta skrefið í bættri tímastjórnun og skipulagningu! Höf: Kristín Ósk Ingvarsdóttir Haustið kemur |
